İsrail Müdafiə Ordusu açıqladı | Tehrana gecə hücumunun detalları - Baku TV

İsrail SEPAH-ın Tehrandakı Kosmik Qüvvələrinin qərargahına zərbə endirdiyini açıqlayıb.

İsrail Müdafiə Ordusu Tehrana son zərbələr dalğası zamanı İslam İnqilabı Keşikçiləri Korpusunun Kosmik Qüvvələrinin qərargahına və 50 sursat anbarına hücum etdiyini bildirib. Bu barədə İsrail Ordusunun mətbuat xidməti məlumat yayıb.

Məlumatda qeyd edib ki, Kosmik Qüvvələrin qərargahı ölkənin Silahlı Qüvvələri ilə əlaqəli olan İran Kosmik Agentliyi üçün qəbuledici, ötürücü və tədqiqat mərkəzi kimi xidmət edirdi.

İsrail hərbçilərinin məlumatına görə, obyektdə tədqiqat mərkəzləri, eləcə də 2022-ci ilin avqustunda buraxılan və SEPAH tərəfindən İsraili izləmək üçün istifadə edilən peykin komandanlıq və idarəetmə strukturu yerləşirdi.

İranın Dövlət Televiziyasının verdiyi xəbərə görə isə ABŞ-nin sualtı qayığının İranın "IRIS Dena" esminesinə hücumu nəticəsində azı 104 nəfər ölüb, daha 20 nəfər itkin düşüb.

Telekanal İran İslam Ordusunun mətbuat xidmətinə istinadən bildirib ki, gəmidə 136 heyət üzvü olub. Qeyd edilir ki, esmines hərbi təlimlərdən qayıdırmış.