İsrail Ordusu Qəzzaya zərbələr endirdi

İsrailin Qəzza zolağına endirdiyi bir sıra hava hücumları nəticəsində azı 32 fələstinli həyatını itirib.

Hücumlar zamanı polis bölmələri, yaşayış binaları və köçkünlərin yerləşdiyi çadırlar hədəf alınıb.

Zərbələr İsrailin HƏMAS-ı atəşkəsi pozmaqda ittiham etməsindən sonra baş verib. HƏMAS isə bu iddiaları “yalan və yanlış” adlandıraraq rədd edib.

Hava hücumlarından biri Qəzzanın cənubundakı Xan Yunis şəhərinin Mavasi bölgəsində yerləşən köçkün çadır düşərgəsinə endirilib. Hadisə nəticəsində qadınlar və uşaqlar da daxil olmaqla, çox sayda mülki şəxs həlak olub.

Şahidlərin sözlərinə görə, partlayışdan sonra ərazi alovlara bürünüb, insanlar yaralıları və uşaqları xilas etməyə çalışıblar.

İsrail Müdafiə Qüvvələri isə açıqlamasında Qəzza zolağı boyunca HƏMAS-a məxsus obyektlərin, o cümlədən silah anbarı, istehsal sahəsi və buraxılış məntəqələrinin vurulduğunu bildirib.

İsrail Müdafiə Qüvvələri Rəfahın şərqində tuneldən çıxan silahlı şəxslərin aşkarlandığını bildirib. Daha sonra onların atəşkəsi pozmağa cəhd etdiklərini qeyd edib.

HƏMAS beynəlxalq ictimaiyyəti və BMT-ni hücumları pisləməyə, İsrail rəhbərliyini məsuliyyətə cəlb etməyə çağırıb.