İsrail Ordusundan HƏMAS-a ağır zərbə

İsrail Müdafiə Ordusu Qəzza zolağının şimalına endirilən zərbə nəticəsində HƏMAS-ın yeni hərbi rəhbəri Məhəmməd Odehin öldürüldüyünü təsdiqləyib.

İsrail Ordusunun mətbuat xidmətinin məlumatına görə, əməliyyatın hədəfi Odehin sığınacaq kimi istifadə etdiyi Qəzza şəhərindəki bir neçə bina olub.

Zərbə bir neçə ay ərzində onun özünün və köməkçilərinin fəaliyyətinin kəşfiyyat müşahidəsindən sonra endirilib. Həmçinin 2023-cü il oktyabrın 7-də İsrailə hücumda iştirak etmiş başqa bir HƏMAS döyüşçüsünün yaxınlıqdakı evi də hədəfə alınıb.

İsrail Müdafiə Ordusunun məlumatına görə, Odeh ötən həftə HƏMAS-ın hərbi qanadına rəhbərliyi öz üzərinə götürüb. Daha əvvəl o, qruplaşmanın kəşfiyyat bölməsinin rəhbəri vəzifəsini tutub.

İsrail Ordusu iddia edir ki, Odeh 7 oktyabr hücumunun planlaşdırılması və koordinasiyasında əsas rol oynayıb, sonradan isə müharibənin gedişində İsrail hərbçilərinə qarşı əməliyyatları və kəşfiyyat fəaliyyətini idarə edib.

İsrail təhlükəsizlik xidməti bəyan edib ki, Odeh 7 oktyabr hücumunun təşkilində iştirak etmiş HƏMAS-ın sonuncu yüksəkrütbəli komandirlərindən biri olub.