İsrail Tehranda əsas infrastruktur obyektlərini atəşə tutub - Baku TV

İsrail Müdafiə Ordusu Tehranda hökumət obyektlərinə, İran Prezidenti Məsud Pezeşkianın Ofisinə və Ali Milli Təhlükəsizlik Şurasının binasına zərbələr endirib.

Bu barədə ordunun mətbuat xidməti xəbər verib.

"Kompleksə zərbə zamanı Prezident Administrasiyasının və Ali Milli Təhlükəsizlik Şurasının binalarına çox sayda sursat atılıb", – deyə İsrail Müdafiə Ordusunun yaydığı məlumatda deyilir.

Bundan başqa, sənəddə təhlükəsizlik sahəsində qərar qəbuluna görə cavabdeh olan Ali Rəhbərin iclaslarının keçirildiyi kompleks, İran zabitlərinin təlim müəssisəsi və digər əsas infrastruktur obyektlərinin vurulduğu qeyd edilir.

"Adıçəkilən kompleks İranda ən çox mühafizə olunan obyektlərdən biridir və Tehranın mərkəzində bir neçə məhəlləni əhatə edir. Rəhbərlik və yüksəkrütbəli təhlükəsizlik rəsmiləri orada mütəmadi olaraq müşavirələr keçirirdilər", – deyə məlumatda bildirilib.

İsrail Müdafiə Ordusu Tehranda yüksəkvəzifəli İran komandirinin məhv edildiyini bəyan edib.

İsrail Ordusunun mətbuat xidmətinin məlumatında deyilir ki, bu yaxınlarda İsrail Müdafiə Qüvvələri Tehranda yüksəkvəzifəli İran komandirinə zərbə endirdi, ətraflı məlumat sonra veriləcək.

İrana qarşı müharibəyə çəkilən xərclər isə sürətlə artmaqda davam edir.

Xarici KİV xəbər verir ki, ABŞ-nin İrana qarşı apardığı “Epik qəzəb” əməliyyatına 3 gün ərzində ABŞ vergiödəyicilərinin vəsaitindən 1,98 milyard ABŞ dolları sərf edilib. Gündəlik xərclər təxminən 220 milyon ABŞ dolları təşkil edir. Bu məbləğə şəxsi heyət, gəmilər, təyyarələr, sursat, logistika və gizli xərclər daxildir.