İsrail XİN rəhbəri İrlandiyanın Baş nazirinə od püskürdü

Oktyabrın 7-də HƏMAS tərəfindən girov götürülən və noyabrın 25-də 4 günlük humanitar fasilə müddətində azadlığa buraxılanlar arasında İrlandiya vətəndaşı, 9 yaşlı Emili Həndin adının da olması İsrail və İrlandiya arasında siyasi gərginliyə səbəb olub.

Məlumata görə, HƏMAS-ın İsrailə hücumu zamanı 9 yaşlı Emilinin öldürüldüyü ehtimal edilsə də, sonradan qızcığazın qaçırılan təxminən 240 nəfərin arasında olduğu dəqiqləşdirilib.

İrlandiyanın Baş naziri Leo Varadkar isə Emilinin 50 gündən sonra sağ qayıtmasına “itmiş və tapılmış qız” deyərək reaksiya verib. O, bununla uşağın HƏMAS tərəfindən qaçırılmadığına, sadəcə belə bir görüntü yaradıldığına işarə edib.

Buna cavab olaraq İsrailin xarici işlər naziri Eli Kohen “X” sosial hesabında L.Varadkarın açıqlamasına sərt münasibət bildirib.

“Deyəsən, mənəvi kompasınızı itirmisiniz və reallığın yoxlanılmasına ehtiyacınız var. Emili Hənd itməmişdi. O, İŞİD-dən daha betər bir qruplaşma – HƏMAS tərəfindən qaçırılmışdı. Sizə ayıb olsun, siz terrorçuların əməllərini həm gizlətməyə, həm də onların bu addımlarına haqq qazandırmağa çalışaraq vəhşiliklərə qanuni don geyindirməyə səy göstərirsiniz”, – deyə E.Kohen öz paylaşımında qeyd edib.

İsrailli nazirin belə sərt reaksiya verməsinin əsas səbəbi odur ki, Emili və 30-dan çox israilli uşağın HƏMAS tərəfindən girov götürülməsi faktı İrlandiyanın Baş nazirinin çıxışlarında dilə gətirilmir.