İsraildə müdafiə nazirinin istefasından sonra kütləvi etirazlar

İsrailin müdafiə naziri Yoav Qalant vəzifəsindən azad olunub. İsrailin Baş naziri Benyamin Netanyahu ölkənin müdafiə nazirini istefaya göndərib.

Bu, Y.Qalantın həmvətənlərinə xüsusi müraciətindən sonra baş verib və o, müxalifətin etirazına səbəb olan məhkəmə islahatının parlamentdə müzakirəsinin dayandırılmasının tərəfdarı olduğunu bildirib. Siyasətçinin fikrincə, ölkənin məhkəmə sistemində dəyişikliklər zəruridir, lakin geniş dialoq yolu ilə həyata keçirilməlidir.

O, islahatla bağlı mübahisələr səbəbindən İsrail cəmiyyətində yaranan parçalanmanın artıq İsrail Müdafiə Qüvvələrinin sıralarına dərindən nüfuz etdiyini deyib. Xüsusən də son həftələr islahatla razılaşmayan ehtiyatda olan ordunun hərbçiləri arasında xidmətdən imtina çağırışları daha çox yayılıb.

Bu arada, Y.Qalantın istefasının elanından sonra başlayan etiraz aksiyası artıq 58 min insanı toplayıb. Etirazçılar Ayalon şosesində nəqliyyatın hərəkətini tamamilə bağlayıblar. Polis hələ ki ciddi müdaxilə etməyib. Hadisə yerinə getdikcə daha çox nümayişçi qrupları gəlməkdə davam edir.