İsrailin müdafiə nazirindən Livanla bağlı xəbərdarlıq

“Livanın “Hizbullah” qruplaşması İsrailə qarşı müharibəyə qoşulsa, bu, Beyrut sakinlərinin evlərini tərk etməyinə yol açacaq “ölümcül xəta” olacaq”.

Bu sözləri İsrailin müdafiə naziri Yoav Qallant deyib.

O xəbərdarlıq edib ki, Livan vətəndaşları “Hizbullah” lideri Həsən Nəsrullah “səhv etsə, Beyrutun taleyi Qəzzanın aqibəti ilə eyni olacağını” bilməlidirlər.

“Mən buradan Livan vətəndaşlarına səslənirəm. Mən artıq Qəzzada vətəndaşların sahil boyu ağ bayraqlarla gəzdiyini və cənuba doğru hərəkət etdiyini görürəm. “Hizbullah” Livanı başlaya biləcək bir müharibəyə sürükləyir və səhv edir.

Əgər “Hizbullah” belə bir səhv etsə, ilk növbədə, bütün Livan vətəndaşları bunun əvəzini ödəyəcəklər. Qəzzada nə ediriksə, Beyrutda da onu edəcəyik”, – deyə nazir bildirib.

Y.Qallantın sözlərinə görə, Qəzza zolağında İsrail Hərbi Hava Qüvvələri indi öz imkanlarının onda birindən azını işə salıb. O xatırladıb ki, ölkənin şimalında – Livanla sərhədlər yaxınlığında aviasiya gücü “çox böyükdür”.