İsrailin müharibəni dayandırmaq üçün şərtləri nələrdir?

İsrail Təhlükəsizlik Kabineti Baş nazir Benyamin Netanyahunun Qəzza şəhərinə nəzarət qərarını təsdiqləyib.

Yerli KİV yazır ki, Netanyahu həm xaricdən, həm də daxildən artan tənqidlərə baxmayaraq, bütün Qəzza zolağına nəzarəti ələ keçirmək niyyətindədir.

Bildirilib ki, böyük ehtimalla, hazırda təxminən 800 000 qəzzalının yaşadığı ərazinin kütləvi şəkildə boşaldılması tələb ediləcək.

10 saatdan artıq davam edən toplantıda qeyd olunub ki, İsrail döyüş bölgələri xaricində mülki əhaliyə humanitar yardım göstərəcək.

Kabinet üzvlərinin əksəriyyəti İsrailin "HƏMAS"la müharibəni dayandırmaq müqabilində irəli sürəcəyi 5 prinsipin siyahısını dəstəkləyib ki, bunlar da "HƏMAS"ın tərk-silah edilməsi, 20-nin sağ olduğu güman edilən 50 girovun hamısının geri qaytarılması, Qəzza zolağının demilitarizasiyası, İsrailin Qəzza zolağına təhlükəsizlik nəzarəti, "HƏMAS" və ya Fələstin Muxtariyyəti olmayan alternativ mülki hökumətin mövcudluğudur.

Qeyd olunub ki, mövcud vəziyyətlə bağlı alternativ plan da müzakirə edilib və bu planın qeyd edilən 5 bənddən ilk 2-ni həyata keçirmək üçün yetərsiz olduğuna qərar verilib. Həmin planla bağlı əlavə məlumat paylaşılmayıb.