İsrailin xarici işlər naziri BMT Baş katibi ilə görüşməkdən imtina etdi

“HƏMAS dünyadan silinməlidir”. Bunu İsrailin xarici işlər naziri Eli Kohen sosial şəbəkədə yazıb.

O, BMT Baş katibi Antoniu Quterreşlə görüşdən imtina etdiyini də bildirib. Nazir buna səbəb kimi BMT-nin balanslı siyasət yeritdiyini göstərib.

Eli Kohen deyib ki, BMT Baş katibi HƏMAS-ın oktyabrın 7-də İsrailə hücumunun birdən-birə baş vermədiyini dediyi üçün o, Quterreşlə nəzərdə tutulan görüşünü ləğv edib.

“Mən BMT Baş katibi ilə görüşməyəcəm. 7 oktyabrda baş verənlərdən sonra balanslı yanaşma yoxdur. HƏMAS yer üzündən silinməlidir”, – deyə Kohen bildirib.

İsrailin BMT-dəki daimi nümayəndəsi Gilad Erdan isə Antonio Quterreşi istefaya çağırıb. O bu barədə sosial şəbəkədə paylaşım edib. Erdan iddia edir ki, BMT Baş katibinin Fələstin-İsrail münaqişəsi ilə bağlı mövqeyi ona bu vəzifəni tutmağa imkan vermir.

“Uşaqların, qadınların və qocaların kütləvi şəkildə qətlə yetirilməsi kampaniyasını başa düşməyən BMT Baş katibi təşkilata rəhbərlik etməyə yaraşmır. Mən onu dərhal istefaya çağırıram”, – deyə Gilad Erdan sosial şəbəkədəki səhifəsində yazıb.