İsrailli girovların qaytarılması ilə bağlı razılaşmanın detalları

İsrail mətbuatı HƏMAS-ın girovları necə azad edəcəyi ilə bağlı detalları açıqlayıb.

Xəbərə görə, Qətərin vasitəçiliyi ilə imzalanan razılaşmaya əsasən, HƏMAS 50 israilli girovu 150 fələstinli məhbusun əvəzində təhvil verəcək. Qeyd olunub ki, azad olunacaq 50 nəfərdən 30-u uşaq, 20-i isə qadındır.

Ümumilikdə 4 günlük atəşkəs müddətində hər gün 12-13 israilli girovun azad ediləcəyi gözlənilir. Məlumata görə, atəşkəs 2 gün daha uzadılsa, əlavə 20 israilli girovluqdan qurtula bilər.

Tərəflər bundan başqa, yanacaq da daxil olmaqla humanitar yardımla dolu 300 yük maşınının Qəzzaya daxil olması barədə də razılığa gəlib. Qeyd olunub ki, yanacaq yalnız atəşkəs dövründə əraziyə buraxılacaq. Çünki İsrail Ordusu Qəzzanın şimal hissəsinə nəzarəti davam etdirəcək.

Ölkənin KAN radiosu isə bildirib ki, azad ediləcək bütün girovlar İsrail vətəndaşlarıdır. HƏMAS xarici vətəndaşları azad etsə, bu, razılaşmadan kənar olacaq.