İsrailli qadının məktubu müzakirələrə səbəb oldu

Girovluqdan azad edilən israilli qadın qızına qulluq etdiklərinə görə HƏMAS silahlılarına təşəkkür məktubu yazıb.

HƏMAS 5 yaşlı qızı Emiliya ilə birlikdə sərbəst buraxılan israilli Danielle Aloninin onlara yazdığı məktubu dərc edib.

"Son həftələrdə bizi müşayiət edən generallara, mənə və qızıma göstərdiyiniz fövqəladə insanlığa görə sizə ürəkdən təşəkkür etmək istəyirəm. Ona bir ailə kimi davrandınız. O, hamınızı çox yaxşı dost hesab edir. Saatlarla ona qayğı göstərdiyiniz üçün təşəkkür edirəm. Qızım indi özünü Qəzzanın kraliçası hesab edir", – deyə yazıda qeyd olunub.

Məktubun dəqiqliyini təsdiqləmək mümkün olmasa da, israilli qadının məktubu yazmağa məcbur edilmiş ola biləcəyi də yayılan xəbərlər sırasındadır.

Qeyd edək ki, bir müddət öncə HƏMAS-ın azad etdiyi bəzi israilli girovların silahlılara əl yelləyərək gülümsəməsi görüntüləri dünya mediasında müzakirələrə səbəb olmuşdu.