İsveç hərbçiləri adada kəşfiyyatı başa çatdırıb

İsveç hərbçiləri Qrenlandiya ərazisində təlimlərlə bağlı kəşfiyyatı başa çatdırıb və Danimarkanın adasını tərk edib. Bu barədə İsveç Silahlı Qüvvələrinin məlumatında bildirilib.

“İsveç Silahlı Qüvvələri Qrenlandiyada kəşfiyyat əməliyyatını başa çatdırıb. Məqsəd NATO üçün getdikcə daha böyük strateji əhəmiyyət kəsb edən Qrenlandiya və Arktikada gələcək təlim tədbirləri üçün şərait və imkanları öyrənmək idi”, – deyə bəyanatda qeyd olunub.

Onu da vurğulayaq ki, İsveç il ərzində regionda təhlükəsizliyi və NATO-nun şimal cinahının müdafiəsini gücləndirmək məqsədi daşıyan “Arktika dözümlülüyü” adlı Danimarka təlimlərində iştirak edəcək.

Bu arada, Ağ Ev rəhbəri Donald Tramp Qrenlandiya ilə bağlı növbəti açıqlama verib. Onun sözlərinə görə, ABŞ-dən başqa heç bir ölkə və ya ölkələr qrupu Qrenlandiyanı qoruya bilməz:

“Mənim həm Danimarka, həm də Qrenlandiya xalqına hörmətim var. Lakin fakt budur ki, Qrenlandiyanı ABŞ-dən başqa heç bir ölkə və ya ölkələr qrupu qoruya bilməz. İkinci Dünya müharibəsində Danimarka Almaniyaya 6 saatlıq müharibədən sonra uduzdu. ABŞ öz qüvvələrini göndərdi və Qrenlandiyanı qorudu. Danimarka bunu bilir. Sonra isə biz Qrenlandiyanı Danimarkaya qaytardıq. Bu, axmaq hərəkət idi, amma biz bunu etdik. Danimarkalılar isə indi nankorluq edirlər. Biz indiyə kimi NATO-dan heç nə almamışıq, Qrenlandiyanı istəyirik”.

Tramp ABŞ-nin beynəlxalq təhlükəsizlik baxımından Qrenlandiyaya ehtiyacı olduğunu, lakin buna baxmayaraq, oraya güc tətbiq etməyəcəyini diqqətə çatdırıb.