Kaliforniya polisi İlon Maskla bağlı qərarını açıqladı

Sensasiyalı açıqlama və hərəkətləri ilə məşhur olan texnologiya lideri İlon Mask bu dəfə yol hərəkəti qaydalarını pozaraq gündəmə gəlib.

Xarici media xəbər verir ki, “Twitter”ı almasından, platformada etdiyi dəyişikliklərdən və Meta CEO-su Mark Zukerberqlə qəfəs döyüşünə girəcəyi barədə bəyanından sonra İlon Mask bu dəfə yol hərəkəti qaydalarını pozaraq adının hallanmasına səbəb olub.

İlon Mask Kaliforniyanın Palo Alto şəhərində avtomobil sürərkən qanunsuz olaraq canlı yayım edib. Bununla belə, Palo Alto polis idarəsi Maska qarşı heç bir cəza tətbiq etməyəcək, çünki polis cinayətin şəxsən şahidi olmayıb.

Palo Altonun polis rəisi Ceyms Rayfşnayder deyib: “Əgər polis əməkdaşı sürücünü əlində telefonla görsəydi, sürücünü cərimələyə bilərdi. Hadisə baş verən zaman heç bir məmur şəxsən bu hadisənin şahidi olmadığı üçün heç bir cəza tətbiq edilmir”.

Qeyd edək ki, əksər ölkələrdə qayda pozuntusunu əks etdirən şəkil və ya video sürücünün cərimələnməsi üçün əsas götürülür.