Keçmiş erməni sədrdən Paşinyanı dəli edəcək açıqlama

“Ermənistan hakimiyyəti Türkiyənin dəstəyi ilə Azərbaycanın irəli sürdüyü bütün tələbləri tədricən yerinə yetirir”.

Bunu Ermənistan parlamentinin keçmiş sədri Tiqran Torosyan deyib. Onun sözlərinə görə, reallıqda 9 noyabr tarixli bəyanatın heç bir hüquqi qüvvəsi yoxdur. Çünki bu sənədlə Ermənistanın Baş naziri Nikol Paşinyan öz üzərinə yerinə yetirilməsi onun səlahiyyətlərinə aid olmayan öhdəliklər götürüb.

“Ermənistanın Baş naziri Kəlbəcər və Zəngilanı hansı səlahiyyət əsasında təslim etmişdi? Bu səlahiyyətlər harada qeydə alınıb? Reallıqda bu bəyanatın heç bir hüquqi qüvvəsi yoxdur.

Azərbaycanın maraqlarından irəli gələn bütün müddəalar ardıcıl surətdə həyata keçirilir, Ermənistan tərəfinin bu və ya digər dərəcədə maraqlarına uyğun gələn müddəalar isə yox”, – deyə T.Torosyan qeyd edib.

T.Torosyan N.Paşinyanın Tiflisdə təqdim etdiyi “Sülh kəsişməsi” layihəsinin reallaşa bilməyəcəyini də deyib. Onun fikrincə, N.Paşinyan bu bəyanatı Rusiya Federasiyasının yollara nəzarət etməyəcəyini aydınlaşdırmaq üçün səsləndirib.