Keşiş aksiyaçılarla bu tarixdə bir araya gələcək | Baqratdan vacib anons

İrəvanda “Vətən naminə Tavuş” hərəkatının iştirakçılarının keçirdiyi yürüş davam edir.

Müqəddəs Anna kilsəsindən başlayan hərəkatın son nöqtəsi bəlli deyil.

Yürüşə başçılıq edən keşiş Baqrat Qalstanyan “Biz çox vacib bir yerə baş çəkəcəyik, əminəm ki, hara getdiyimizi hamı bilir. Hesabat tələb etmək lazımdır və aksiyaçılar bunu iyunun 4-ü edəcəklər”, – deyə qeyd edib.

B.Qalstanyan hərəkatın üzvləri ilə birlikdə iyunun 7-si daha vacib bir toplantının baş tutacağının anonsunu da verib. Lakin toplantının detalları açıqlanmayıb.

Məlumat üçün bildirək ki, aksiyanın bəzi iştirakçıları etiraz əlaməti olaraq özlərini zəncirləyiblər. Buna səbəb isə bir neçə gün öncə İrəvanda etirazlar zamanı bir neçə aksiya iştirakçısının polis tərəfindən saxlanılması olub. Onlar iddia edirlər ki, məhkəmə qərarı olmadığı halda polis etirazçıları bir neçə gün bölmədə saxlaya bilməz.

Xatırladaq ki, Azərbaycan və Ermənistan arasında delimitasiya və demarkasiya işlərinin aparılması ilə bağlı razılıq əldə edildikdən sonra arxiyepiskop Baqrat Qalstanyan Baş naziri istefaya çağırıb.