Kılıçdaroğlunun məhkəməyə verilmə səbəbi | 8 ildən sonra nə dəyişdi?

Türkiyə Prezidenti Rəcəb Tayyib Ərdoğan Cümhuriyyət Xalq Partiyasının sabiq sədri Kamal Kılıçdaroğlunu 500 min lirə məbləğində mənəvi zərərin ödənilməsi tələbi ilə məhkəməyə verib.

Bu barədə Ərdoğanın vəkili Hüseyin Aydın “X” sosial şəbəkə hesabında yazıb.

“2016-cı il 15 iyul dövlət çevrilişinə cəhddən sonra Prezident siyasi müzakirələrdə gərginliyin azaldılması və neytral mühitin yaradılması ümidi ilə Kılıçdaroğluna qarşı qaldırdığı bütün iddialardan imtina etdi. Lakin bu məsələnin üzərindən 8 il keçsə də, qarşı tərəfdən münasibətlərin bərpasına dair heç bir irəliləyiş yoxdur. Əksinə, onlar kobudluğa üstünlük veriblər”, – deyərək vəkil qeyd edib.

Hüseyin Aydın Ərdoğanın hüquqlarının ciddi şəkildə pozulduğunu bildirib.

O vurğulayıb ki, Ankara Baş Prokurorluğunda Türkiyə liderinə qarşı təhqiramiz ifadələrin yer aldığı məhkəmə bəyanatlarına dair cinayət işi açılıb. İlkin olaraq, 500 min türk lirəsi məbləğində mənəvi zərərin ödənilməsi ilə bağlı məhkəməyə iddia ərizəsi verilib.