Kimsə mənə ağıl verməsin! | İsrailin Baş naziri xalqa müraciət etdi

İsrailin Baş naziri Benyamin Netanyahu yerli əhalinin onun siyasi fəaliyyətinə kütləvi etirazı və ABŞ Prezidenti Cozef Baydenin “B.Netanyahu daha çox iş görməlidir” deməsinin fonunda xalqa səslənib.

O öz çıxışında xüsusilə girovların ailələrinə səslənərək geri addım atmayacağını bir daha dilə gətirib.

“Heç kim girovları azad etməkdə məndən daha çox qərarlı deyil. Onların azad edilməsi üçün məndən çox mübarizə aparan yoxdur. Ona görə də kimsə mənə bu mövzuda necə hərəkət etməyə dair ağıl verməsin.

Biz həyatını itirən girovların ailələrinə başsağlığı veririk. Onlar qədər biz də üzgünük. Həyatlarını xilas edə bilmədiyimizə görə girovların yaxınlarından üzr istəyirəm. HƏMAS-ın irəliləyə biləcəyi hər tərəfdən yolunu bağlamağa və sağ olduğuna ümid etdiyimiz bütün girovları geri qaytarmağa çalışırıq”, – deyə B.Netanyahu bildirib.

İsrailin Baş naziri xalqa müraciətində HƏMAS-la niyə hələ də danışıqların baş tutmaması məsələsinə də toxunub. Bildirib ki, HƏMAS qruplaşmasının üzvləri hələ də Qəzzaya silah qaçaqmalçılığı ilə məşğuldur. Bu fakt var ikən danışıqların baş tutması mümkünsüzdür.