Kir Starmer | "Mən boyun əyməyəcəyəm, Böyük Britaniya da boyun əyməyəcək" - Baku TV

Böyük Britaniyanın Baş naziri Kir Starmer bildirib ki, ABŞ-nin Qrenlandiyanı əldə etməsi tələblərinə qarşı çıxmaq mövqeyindən dönməyəcək və bu məsələdə Donald Trampın təzyiqlərinə boyun əyməyəcək.

Bu barədə “Reuters“ agentliyi məlumat yayıb.

Starmer əlavə edib ki, ABŞ lideri Böyük Britaniyaya təzyiq göstərmək üçün Çaqos adaları ilə bağlı razılaşmaya əvvəlki dəstəyini geri götürüb.

Baş nazir Qrenlandiya məsələsində tərəfləri sakit müzakirəyə çağıraraq Trampın Britaniya və digər Avropa ölkələrinə qarşı rüsum tətbiq etməsindən sonra ticarət müharibəsini gərginləşdirmək istəmədiyini bildirib.

Starmer Qrenlandiyanın gələcəyinə onun xalqının və Danimarkanın qərar verməli olduğunu vurğulayıb və bu mövqeyini dəyişməyəcəyini deyib.

“Rüsum hədələri altında Qrenlandiyanın gələcəyi ilə bağlı prinsiplərimizdən və dəyərlərimizdən geri çəkilməyəcəyəm. Mən boyun əyməyəcəyəm, Böyük Britaniya da boyun əyməyəcək. Bu mənim açıq mövqeyimdir”, – deyə Starmer əlavə edib.

Sonda Kir Starmer Danimarkanın Baş nazirinin yanvarın 22-də Londona səfər edəcəyini bildirib.