Kirayədə qalanlar az yaşayır? | Oksford Universitetindən maraqlı araşdırma

Oksford Universitetində aparılan araşdırma erkən yetkinlik dövründə ev sahibi olmağın kişilərin gözlənilən ömür uzunluğuna müsbət təsir etdiyini ortaya çıxarıb.

Tədqiqat 1920-1940-cı illərdə ABŞ-də aparılan siyahıyaalma məlumatları və ölüm qeydləri əsasında həyata keçirilib. Araşdırmada 24-35 yaş aralığında ev sahibi olan kişilərlə kirayədə yaşayanların gözlənilən ömür uzunluğu müqayisə edilib.

Nəticələr göstərib ki, 20-ci əsrin əvvəllərində doğulan amerikalı kişilər arasında erkən yetkinlik dövründə ev sahibi olanların gözlənilən ömrü kirayədə yaşayanlarla müqayisədə 4-6 ay daha uzun olub.

Bununla yanaşı, ev sahibi olmaq qaradərili amerikalı kişilərin ömrünü orta hesabla 0,36 il, ağdərili amerikalı kişilərin ömrünü isə 0,42 il artırıb.

Tədqiqat həmçinin əmlakın dəyərinin ömür uzunluğuna təsirinin minimal olduğunu göstərib. Yəni ucuz-bahalı olması önəmli deyil, əsas odur ki, bir kişinin mənzili olsun. Çünki bu halda daha çox yaşayacaq.

Bu araşdırma sosial mənzil siyasətinin bərabər imkanların təmin olunmasında və sosial ədalətin gücləndirilməsində necə təsirli ola biləcəyini göstərir.