Kiyev bunu bilərək edir | Belarus Prezidentindən iddia

“Ukraynanın Kursk bölgəsindəki hərəkətləri Rusiyanın taktiki nüvə silahından istifadə etməsi üçün qəsdən düşünülmüş təxribat ola bilər”.

Bunu Belarus Prezidenti Aleksandr Lukaşenko deyib. Onun sözlərinə görə, Kiyev Moskva ilə münaqişədə bilərəkdən gərginliyi artırır.

“Qərb açıq şəkildə Ukrayna münaqişəsinə qarışa bilər – NATO qoşunları sərhədyanı ərazilərə daxil olmağa can atır. Hazırda 120 min Ukrayna hərbçisi Belarus Respublikası sərhədləri yaxınlığında cəmləşib. Ukrayna əhalisinin əksəriyyəti Kiyev rejiminin planlarını dəstəkləmir. Əhalinin 70%-i artıq Zelenskiyə nifrət edir”, – deyə A.Lukaşenko bildirib.

Xatırladaq ki, bir neçə gün əvvəl Belarus böyük hərbi birləşmələri, o cümlədən tank briqadalarını Ukrayna ilə sərhədə yerləşdirib. Buna Ukrayna Silahlı Qüvvələrinə məxsus pilotsuz təyyarələrin respublikanın hava məkanını pozması səbəb olub.