Kiyev metrosu atəşə tutuldu | Ukraynada ciddi dağıntılar var

İyulun 21-i səhər saatlarına qədər Ukraynada paytaxt Kiyev də daxil olmaqla bir sıra vilayət və şəhərlər Rusiya Ordusu tərəfindən kütləvi dron və raket hücumlarına məruz qalıb.

Nəticədə, təkcə Kiyevin altı rayonunun mərkəzi küçələrində ciddi dağıntılar var. Ölənlərin və yaralıların da olduğu bildirilir.

Kiyevdən başqa Ukraynanın İvano-Frankovsk, Xmelnitski, Rovno, Vinnitsa və digər qərb vilayətləri də hücumlara məruz qalıb.

İlkin məlumatlara görə, Rusiya Ordusu ballistik raketlərdən və 400-ə qədər drondan istifadə edib. Təkcə Kiyevdə 20-dən çox yaşayış binası yararsız hala düşüb.

“Çətindir. Hər gecə həyatda qalmağa çalışırıq, axı biz insanıq. Əgər danışmağa başlasam, ağlayacağam. Bu gün metronu da vurdular. Əvvəllər insanlar heç olmasa, metroya düşürdülər, amma bu gün qorxdular. Bəs indi necə sağ qalaq? Necə yaşayaq? Heç kim bizim haqqımızda düşünmür. Ümumiyyətlə, heç kimə lazım deyilik”, ‒ deyə Kiyev sakini Lyudmila İvanova bildirib.

Qeyd edək ki, kütləvi hücumlar nəticəsində Kiyevin bir sıra mərkəzi metro stansiyaları müvəqqəti bağlanıb.