Kiyev Moskvanı dialoqa çağırdı

Kiyev Kremlə yeni danışıqlar raundu keçirməyi təklif edib.

Bu barədə Ukrayna Prezidenti Volodimir Zelenski Milli Təhlükəsizlik və Müdafiə Şurasının katibi Rustem Umerovla görüşdən sonra bildirib.

V.Zelenskinin sözlərinə görə, İstanbulda keçirilən son görüşdə əldə olunan razılaşmalar icra olunur, əsir mübadiləsi istiqamətində dialoq davam edir və növbəti mübadilə üzərində iş gedir.

Ölkə başçısı qeyd edib ki, danışıqlar dinamikasını gücləndirmək lazımdır və Rusiya qərarlardan yayınmaqdan əl çəkməlidir:

“Sülhün təmin olunması üçün liderlər səviyyəsində görüşə ehtiyac var. Ukrayna belə bir görüşə hazırdır. Biz həmçinin ABŞ ilə, xüsusilə də Donald Tramp Administrasiyası ilə əməkdaşlığı genişləndirmək niyyətindəyik. Kiyev hava hücumundan müdafiə və yeni silah razılaşmalarının tezliklə icrasına çalışır”.

V.Zelenski sonda bildirib ki, Ukrayna yüksək texnologiyalı yerli silahların, xüsusilə döyüşdə effektivliyini sübut etmiş dronların ABŞ-yə ixracına hazırdır.