Kiyevə kəşfiyyat məlumatları ötürülür? | Lavrovu özündən çıxaran məsələ

“NATO Kiyevə uzaqmənzilli silahlarla yanaşı, kosmik kəşfiyyat məlumatları da ötürür”.

Bunu Rusiya xarici işlər naziri Sergey Lavrov Diplomatiya Akademiyasında Ukrayna böhranı ilə bağlı xarici ölkələrin səfirləri üçün keçirdiyi dəyirmi masada bildirib.

Onun sözlərinə görə, NATO-nun hədəfi Rusiya ərazisində yaşayış binaları, enerji və sənaye infrastrukturu, o cümlədən sosial obyektlərdir.

Nazir Qərbin Ukraynaya uzaqmənzilli raketlərlə Rusiya ərazisini vurmaqla bağlı verdiyi icazədən də danışıb:

“Şübhə etmirik ki, Rusiya Federasiyasının ərazisinə hücumlar üçün uzaqmənzilli silahlardan istifadəyə qoyulan məhdudiyyətlərin aradan qaldırılması barədə qərar çoxdan verilib. İndi onlar bunu daha yaxşı şəkildə rəsmiləşdirməyə çalışırlar”.

S.Lavrov Rusiya qüvvələrinin Ukrayna qoşunlarını Kursk vilayətindən çıxardığını da söyləyib.