Kreml sülhə razı olacaq? - ABŞ və Rusiya arasında kritik müzakirənin səbəbi

ABŞ və Rusiya rəsmiləri bu ay keçirilən Ukrayna üzrə sülh danışıqları çərçivəsində bir sıra enerji razılaşmaları barədə müzakirələr aparıb.

Bu barədə “Reuters” etibarlı mənbələrə istinadla məlumat yayıb.

Məlumata görə, bu enerji razılaşmaları Kremlin sülhə razı salınması və ABŞ-nin Rusiyaya qarşı sanksiyaları yumşaltması üçün təşviq kimi irəli sürülüb.

Danışıqlar ABŞ nümayəndəsi Stiven Uitkoffun Moskvaya səfəri zamanı Rusiya Prezidenti Vladimir Putin və onun nümayəndəsi Kirill Dmitriyevlə görüşündə aparılıb. Bu məsələlər Ağ Evdə ABŞ Prezidenti Donald Trampla da müzakirə olunub. Müzakirələrdə “Exxon Mobil” şirkətininin Rusiyanın “Saxalin-1” neft-qaz layihəsinə qayıtması ehtimalı gündəmə gəlib.

Həmçinin Rusiyanın “Arktik LNG 2” layihəsi üçün ABŞ-dan avadanlıq alması məsələsi də qaldırılıb. Digər bir təklif isə ABŞ-nin Rusiyadan nüvə enerjisi ilə işləyən buzqıran gəmilər alması olub.

Məlumatda qeyd olunub ki, “Exxon” 2022-ci ildə Rusiyadakı fəaliyyətini dayandırmışdı. “Arktik LNG 2” layihəsi isə Qərbin sanksiyalarına baxmayaraq, bu il az da olsa istehsala başlayıb. ABŞ Rusiyanın bu layihələrdə Çin texnologiyasından deyil, Amerika avadanlığından istifadə etməsini istəyir.

Avqustun 15-də keçirilən Alyaska sammitində də bu razılaşmalar qısa şəkildə müzakirə olunub. Həmin gün Putin xarici investorların “Saxalin-1” layihəsində paylarını geri almağa imkan verən fərman imzalayıb.