Kreml “Wildberries” və gəmi insidentinə münasibət bildirib

Rusiyanın ən böyük onlayn pərakəndə satış şirkəti olan “Wildberries”ə məxsus anbarlara Ukraynanın hücum etməsi həm sözügedən şirkətə, həm də kiçik və orta sahibkarlıq subyektlərinə zərər vurub.

“Wildberries” anbarlarından hərbi yüklərin daşınması üçün istifadə olunub-olunmadığı barədə suala cavab verən Kremlin sözçüsü Dmitri Peskov iddiaları təkzib edib və vəziyyətin asan olmadığını bildirib:

“Bu, doğru deyil. Kiyev rejimi mülki obyektlərə zərbə endirməyə davam edir. Bu, Kiyev rejiminin terrorçu mahiyyətini göstərir. Adını çəkdiyiniz şirkətə gəlincə, vəziyyət, həqiqətən də, çətindir, çünki həm şirkətin özü, həm də kiçik və orta biznes ciddi itkilərə məruz qalıb. Hökumət bu məsələ ilə məşğul olur”.

Bundan başqa, Peskov qeyd edib ki, Odessa limanını tərk edən yük gəmisinə raket zərbəsi nəticəsində dörd Hindistan vətəndaşının həlak olmasından sonra Hindistandakı tərəfdaşları ilə əlaqə saxlayıblar:

“Biz hindistanlı tərəfdaşlarımızla təmaslarımızı davam etdiririk. Mövqeyimizi onlara izah edirik. Əsas məqam ondan ibarətdir ki, Silahlı Qüvvələrimiz Kiyev rejiminin ehtiyacları üçün avadanlıq, silah və digər yüklərin daşınmasında iştirak edən gəmilərə zərbələr endirib və bundan sonra da endirəcək”.