Lavrov CNN-in məlumatını təkzib etdi

“Marko Rubio ilə kifayət qədər ətraflı danışdıq. Söhbət zamanı Rusiya və ABŞ prezidentlərinin oktyabrın 16-da baş tutan telefon danışığında razılaşdırdıqları görüş müzakirə olunub”.

Bu sözləri Rusiyanın xarici işlər naziri Sergey Lavrov deyib.

“Biz prosesin Prezident Vladimir Putin və Donald Tramp arasında Alyaskada əldə olunan razılaşmalar əsasında aparılmasının tərəfdarıyıq. Marko ilə hazırkı situasiyanı müzakirə etdik. Növbəti görüşün necə keçirilməsi barədə də fikir mübadiləsi aparıldı. Çünki Tramp görüşün Budapeştdə keçirilməsini təklif edib. Əsas yer və vaxt yox, Ankoricdə razılaşdırılmış məsələlər üzrə irəliləməkdir. Telefon danışıqlarını davam etdirəcəyik ki, problemin həllinə düzgün yanaşaq.

CNN-də yayılan yazını oxuyanda təəccübləndim. Qeyd olunmuşdu ki, Tramp ilə Putinin görüşü təxirə salına bilər. Onların fikrincə, mən və Rubionun telefon danışığı uğurlu alınmayıb, çünki Rusiya sərt tələblərindən əl çəkmir. Qərb mediasının qərəzli informasiya yayması hər kəsə bəllidir, CNN də bu baxımdan məşhurdur.

Bircə onu deyə bilərəm ki, Putin və Tramp arasında Alyaska danışıqlarında əldə olunan razılaşmalara uyğun olaraq Rusiya öz mövqeyini dəyişməyib. Tramp da buna görə demişdi ki, heç nəyə gətirməyəcək atəşkəs yox, uzunmüddətli və möhkəm sülh lazımdır”, – deyə o, sözlərinə əlavə edib.