Livan-İsrail sərhədində gərginlik davam edir | İsrail müdafiə nazirindən xəbərdarlıq

“İsrailin Livanla sərhəddə vəziyyəti sabitləşdirmək üçün “Hizbullah” hərəkatına qarşı hərbi əməliyyat keçirməkdən başqa çarəsi yoxdur”.

Bunu İsrailin müdafiə naziri Yoav Qalant ölkəyə səfərə gələn ABŞ prezidentinin enerji və investisiyalar üzrə köməkçisinin müavini və baş müşaviri Amos Hokstinlə görüşdə deyib.

O, Livan-İsrail sərhədində vəziyyətin həlli ilə bağlı razılığın əldə olunması imkanlarının aşağı olduğunu vurğulayıb. Çünki “Hizbullah” Qəzza zolağında fəaliyyət göstərən HƏMAS hərəkatı ilə bağlılığını davam etdirir və münaqişəni dayandırmaqdan imtina edir.

“İsrailin şimalında yaşayan sakinlərin evlərinə qayıtmasının yeganə yolu hərbi əməliyyatdır”, – deyə nazir bildirib.

Bu arada, Livan ərazisindən İsrailin şimal rayonlarına 10-dan çox raket atıldığı qeydə alınıb. Bu barədə İsrail Ordusunun Mətbuat Xidməti məlumat yayıb.

Məlumata görə, mərmilərin əksəriyyəti Ramot-Naftali sərhəd yaşayış məntəqəsi istiqamətində atılıb. Onların bəziləri İsrail hava hücumundan müdafiə qüvvələri tərəfindən məhv edilib, mərmilərdən biri kəndin ətrafına düşüb. Ölən və yaralılar barədə məlumat daxil olmayıb.