Livanda növbəti ağlasığmaz partlayışın detalları | Ağ Evin əli var?

İsrailin Livanda icra etdiyi peycer partlayışlarının ikinci dalğası da insan ölümü olmadan ötüşməyib.

Bu barədə məlumatı ölkənin Səhiyyə Nazirliyi yayıb. Bildirilib ki, partlayış nəticəsində azı 14 nəfər həlak olub, 460 nəfər yaralanıb.

“İkinci partlayış dalğası təkcə rabitə vasitələri və qurğular vasitəsilə deyil, həm də "Icom" radioları, notbuklar və avtomobil maqnitofonlarının partladılması hesabına reallaşdırılıb. Təbii ki, partlayışlar məsafədən idarə olunaraq icra edilib”, – deyə Nazirlikdən bildirilib.

Təhlükəsizlik orqanları vətəndaşlara vacib olmadıqca insanların sıx olduğu yerlərə getməməyi və elektron cihazlardan uzaq durmağı tövsiyə edib.

Məlum hadisədən sonra sentyabrın 20-də BMT-nin növbəti təcili iclasının keçirilməsi gözlənilir. Ehtimal edilir ki, əsas müzakirə mövzusu İsrail-Livan müharibəsi və peycer silsilə partlayışları olacaq.

Sentyabrın 18-də isə BMT İsrail qüvvələrinin Qəzzanı tərk etmək tələbi ilə qətnamə qəbul edib. Məsələnin ən maraqlı tərəfi isə ondan ibarətdir ki, Ağ Evlə BMT-nin mövcud vəziyyətə yanaşması fərqlidir.

Cozef Bayden Administrasiyası siyasi yöndən SAXAL-ı və onun antiterror əməliyyatlarını dəstəkləsə də, BMT tam əksinə Benyamin Netanyahunu geri addım atmağa çağırır. Amma görünür, rəsmi Vaşinqtonun İsraili dəstəkləməsi Ağ Evin dolayısı ilə Livandakı partlayışlarda əli ola bilmə ehtimalını gündəmə gətirib.

Bu şübhələrin daha da geniş vüsət almasını istəməyən Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi "mən təkcə onu deyə bilərəm ki, bizim bu partlayışlarda əlimiz yoxdur", – deyə bildirib:

"ABŞ-nin Livandakı partlayışların Qəzza zolağında atəşkəs razılaşması məsələsinə necə təsir edəcəyini qiymətləndirmək çətindir. Amma ümid edirik ki, hər şey tez bir zamanda öz həllini tapacaq. Biz Livanla sərhəddə ikinci cəbhənin açılmasının qarşısını almaq üçün diplomatik səylərimizi davam etdiririk".