Los-Ancelesi bürüyən yanğın faciəyə səbəb oldu | Şübhəli şəxs barədə məlumat

Los-Anceles dairəsinin hakimiyyəti bölgədə 14 min hektardan çox ərazini əhatə edən meşə yanğınları ilə əlaqədar komendant saatının tətbiqi üzərində işləyir.

Komendant saatı 18:00-dan 06:00-a qədər yanğın ocaqları ətrafındakı zərər çəkmiş ərazilərdə elan ediləcək.

Tədbir yanvarın 10-u axşam saatlarına qədər təsdiqlənəcək. Təhlükəsizlik tədbirlərinin gücləndirilməsi üçün Milli Qvardiyadan dəstək istənilib. Onlar yol hərəkətinin tənzimlənməsi və infrastrukturun mühafizəsində kömək edəcəklər.

Qeyd edək ki, son məlumatlara əsasən, yanğınlar zamanı həlak olanların sayı 10 nəfərə çatıb. Bununla yanaşı, hadisədən istifadə edərək talançılıqla məşğul olan ən azı 20 nəfər saxlanılıb. Meşə yanğınları nəticəsində dəyən ümumi zərər və iqtisadi itkilərlə bağlı ilkin qiymətləndirilməyə əsasən, zərərin 135-150 milyard dollar təşkil etdiyi bildirilir.

Los-Anceles Polis Departamenti hadisə ilə bağlı araşdırma aparıldığını və 1 nəfərin şübhəli şəxs qismində həbs edildiyini açıqlayıb. Prokurorun dediyinə görə, yerli sakinlər şübhəlinin həbsinə kömək ediblər və günahı sübuta yetirilərsə, onu ömürlük həbs cəzası gözləyir.