Lukaşenko Rusiyanın Ukrayna ilə müharibəyə girmək tələbini rədd etdi

Belarus Prezidenti Aleksandr Lukaşenko ölkəsini Ukraynaya qarşı müharibəyə cəlb etməyə çalışan Rusiyaya müqavimət göstərir.

Bu barədə ABŞ-nin Müharibə Araşdırmaları İnstitutu (ISW) məlumat yayıb.

“Belarusun Ukraynaya qarşı müharibəyə girməsini istəyən Kreml bu məqsədlə Aleksandr Lukaşenkoya təzyiqi artırıb. Belarus lideri isə Rusiyaya qarşı hörmətini qorumaq şərtilə Kremlin tələblərinə müqavimət göstərməyə davam edir”, – məqalədə bildirilib.

ISW analitikləri qeyd ediblər ki, Moskva Minski Rusiya Ordusunun Belarus ərazisindən Ukraynaya qarşı dronlar atmasına və cəbhə xəttini qərbə doğru genişləndirməsinə icazə verməyə inandırmağa çalışır. Rusiyanın planına görə, bu, Ukraynanı qoşunlarını cəbhə xəttindən Belarusla sərhədə çəkməyə məcbur edəcək.

Rusiyanın keçmiş kəşfiyyat zabiti ABŞ institutuna deyib ki, Kreml Minski bu tələbləri yerinə yetirməkdən imtina edəcəyi təqdirdə maliyyə dəstəyini kəsəcəyi ilə hədələyir. Həmçinin vurğulayıb ki, Rusiya məqsədinə nail olmaq üçün Ukraynanı Belarus üçün “təhdid” kimi təqdim etməyə davam edir.

Kremlin sözçüsü Dmitri Peskovun sözlərinə görə, Rusiya həmişə Belarusu dəstəkləyəcək, ona qarşı “Ukraynadan gələn təhdidlər”i dəf edəcək.

ISW-nin fikrincə, Lukaşenko Rusiyanın Belarusa dəstəyini qorumaqla vəziyyətdən çıxmaq üçün yol axtarır:

“Aleksandr Lukaşenko 2022-ci ildən bəri Moskvanın Ukraynadakı əməliyyatlarına dəstək üçün Belarus Silahlı Qüvvələrini və ya belarusluları Rusiya Ordusuna tam şəkildə cəlb etmək tələblərinin qarşısını almağa və rədd etməyə davam edir. Həmçinin Lukaşenko və digər yüksəkvəzifəli rəsmilər Ukraynanı Belarus üçün təhdid kimi təqdim edən Kremlin mövqeyini təkrarlamaqdan çəkinir, Kiyevə qarşı nisbətən neytral ritorikanı qoruyub saxlayırlar”.