Luvr muzeyinin qarəti ilə bağlı bütün şübhəlilər saxlanılıb

Fransada Luvr muzeyinin qarət işi üzrə bütün şübhəlilərin saxlanılması prosesi başa çatdırılıb.

Bu barədə "Bild" nəşri məlumat yayıb.

Bildirilir ki, ümumilikdə yaşı 34-39 arasında olan dörd kişi həbs edilib.

Son şübhəli bir həftə əvvəl Fransanın Laval şəhərində tikinti meydançasında saxlanılıb və hazırda təkadamlıq kamerada saxlanılır.

Onun vəkilləri müvəkkilinin Luvrda olduğuna dair sübutların mövcud olmadığını bildirərək həbs qərarından apellyasiya şikayəti verəcəklərini açıqlayıblar.

Məlumata görə, 39 yaşlı şübhəli Sena-Sen-Deni departamentindəndir və daha əvvəl altı dəfə sutenerlik, sürücülük vəsiqəsi olmadan avtomobil idarəetməsi, oğurlanmış əşyaların satışı və digər cinayətlərə görə məhkum olunub. O, 2010-cu ildə törətdiyi cinayətlərdən birinə görə iki ay şərti cəza alıb.

İstintaqın versiyasına əsasən, dəstənin iki üzvü birbaşa Apollon Qalereyasına daxil olub, digər iki nəfər, o cümlədən sonradan saxlanılan şəxs binanın çölündə gözləyib. Onlar birlikdə dəyəri 88 milyon avro olan kral zinət əşyalarını oğurlayaraq hadisə yerindən qaçıblar. Son şübhəli qarətdən sonra qiymətli əşyaları ağ furqonda daşıyıb.

İş üzrə daha bir fiqurant şübhəlilərdən birinin həyat yoldaşı cinayətə kömək etməkdə ittiham olunur, lakin hələlik azadlıqdadır.

Saxlanılanlar xırda cinayətkarlar hesab edilir və müstəntiqlər cinayətin arxasında sifarişçi və əsas təşkilatçının dayandığını istisna etmirlər. Oğurlanmış kral zinət əşyalarının harada olması isə hələ də məlum deyil.