Macarıstana neft tədarükü dayandırıldı | Dəhşətli hücumun detalları üzə çıxdı

Ukrayna hərbçiləri Rusiyanın Bryansk vilayətində "Uneça" neft nasos stansiyasına növbəti dəfə zərbə endirib.

Stansiya iki boru kəməri üçün neft nəql edir ki, onlardan biri də "Drujba"dır.

Ukrayna KİV-in məlumatına görə, stansiyaya Ukraynanın Pilotsuz Sistemlər Qüvvələrinin 14-cü alayının döyüşçüləri hücum ediblər.

Eyni zamanda Macarıstanın xarici işlər naziri Peter Siyarto Macarıstana "Drujba" boru kəməri ilə neft nəqlinin dayandırıldığını elan edib.

"Gecə xəbər daxil oldu ki, Rusiya-Belarus sərhədindəki "Drujba" neft kəməri qısa müddət ərzində üçüncü dəfə hücuma məruz qalıb. Macarıstana xam neftin nəqli yenidən dayandırılıb! Bu, ölkəmizin enerji təhlükəsizliyinə növbəti hücumdur", – deyə o özünün "Facebook" hesabında yazıb.

P.Siyarto həmçinin "Drujba"ya hücumları "müharibəyə cəlb etmək cəhdi" adlandırıb. Onun sözlərinə görə, bu heç bir nəticə verməyəcək, Macarıstan sülhün bərqərar edilməsi və milli maraqların qorunması səylərini bütün gücü ilə dəstəkləməyə davam edəcək.

Xatırladaq ki, stansiyaya bundan əvvəl bu ilin avqustun 6-sı və 13-də hücum edilib. Avqustun 18-də Rusiyanın Tambov vilayətindəki "Nikolskoye" neft nasos stansiyası hücuma məruz qalıb. Bu, "Drujba" neft kəməri ilə Avropaya tədarükün müvəqqəti dayandırılmasına səbəb olub. Avqustun 20-də Macarıstana neft tədarükü bərpa edilib.