Mahmud Abbasdan müharibə xəbərdarlığı | Fələstinlilər olaraq müharibəyə qarşıyıq

“İran yaxın saatlarda HƏMAS hərəkatının Siyasi Bürosunun rəhbəri İsmayıl Haniyənin öldürülməsinə görə İsrailə cavab tədbirlərinə dair qərar verə bilər”.

Bunu Fələstin lideri Mahmud Abbas Moskvada Rusiya Prezidenti Vladimir Putinlə görüşündən sonra TASS agentliyinin baş direktorunun birinci müavini Mixail Qusmana müsahibəsində deyib.

“Qərar yaxın bir neçə gün və hətta yaxın bir neçə saat ərzində verilə bilər. Birincisi, biz fələstinlilər olaraq müharibəyə qarşıyıq. Oktyabrın 7-də biz rəsmən bəyan etdik ki, müharibənin əleyhinəyik, dinc əhalinin, qadınların və uşaqların öldürülməsinə qarşıyıq.

Nə olacağını hələ proqnozlaşdıra bilmərik. Amma ümid edə bilərik ki, heç bir eskalasiya olmayacaq, nəticələrini əvvəlcədən qiymətləndirmək çətin olan müharibə olmayacaq”, – deyə Mahmud Abbas bildirib.

Fələstin lideri Mahmud Abbas Vladimir Putinlə görüş zamanı isə deyib ki, BMT, ABŞ-nin təzyiqinə görə Fələstin problemi həll edə bilməyib.

“1947-ci ildən bəri BMT Fələstin məsələsi ilə bağlı mindən çox qətnamə qəbul edib. Lakin ABŞ-nin təzyiqi nəticəsində son olaraq öz missiyasını yerinə yetirə bilməyib. Fələstin xalqının hüquqlarının həyata keçirilməsinin təmin edəcək bir qətnamə qəbul edə bilməyib”, – deyə Mahmud Abbas vurğulayıb.