Makron odla oynadı | Rusiyadan Makrona sərt reaksiya

“Fransa Prezidenti Emmanuel Makron Ukraynaya hərbi kontingentin göndərilməsi ilə bağlı müzakirələrə başlamaqla odla oynayır”.

Bunu Rusiya Xarici İşlər Nazirliyinin MDB ölkələri üzrə ikinci departamentinin rəhbəri Aleksey Polişuk deyib.

Fransa liderinin müvafiq bəyanatlarını şərh edən diplomat bu fikirlərin narahatlıq doğurduğunu bildirib.

Onun sözlərinə görə, bir çox Qərb siyasətçiləri öz ölkələrinin milli maraqlarını siyasi vəziyyətə və seçki maraqlarına qurban verirlər.

“Görünür, onlar böhranın eskalasiyası və böyüməsi risklərindən xəbərsizdirlər. Bu, siyasi infantilizmdir. Kiyev rejiminə silah ötürməyin ağır nəticələri ilə bağlı xəbərdarlıqlarımıza məhəl qoymurlar”, – deyə Aleksey Polişuk bildirib.

Qeyd edək ki, bir müddət əvvəl Fransa Prezidenti Parisdə 20-yə yaxın Qərb dövlətinin nümayəndələrinin iştirakı ilə keçirilən görüşdə Ukraynaya quru qoşunlarının göndərilməsi mövzusunun qaldırıldığını bildirib.

E.Makronun sözlərinə görə, iştirakçılar bu məsələdə konsensus əldə etməsələr də, gələcəkdə belə bir ssenarinin olması da istisna deyil.