Makron Pekinə böyük nümayəndə heyəti ilə yollanıb

Fransa Prezidenti Emmanuel Makron Avropa İttifaqının ticarət qaydalarını sərtləşdirməyə hazırlaşdığı bir vaxtda Pekində Çin lideri Si Cinpinlə görüşü daha güclü ticarət əlaqələri qurmaq istəyi fonunda baş verib.

E.Makronu dünyanın ikinci ən böyük iqtisadiyyatına sahib Çinə etdiyi dördüncü dövlət səfərində böyük biznes nümayəndə heyəti müşayiət edib.

E.Makron keçmişdə Çinlə münasibətlərdə güclü bir Avropa cəbhəsi qurmağa çalışıb, eyni zamanda Çinin Fransanın ən görkəmli şirkətlərinin bir çoxu üçün əsas ixrac bazarı olduğu Pekinə qarşı çıxmamağa diqqət yetirib.

Görüş əsnasında Fransa lideri Ukrayna məsələsini də diqqətdən kənar qoymayıb.

“Ümid edirəm ki, Çin bizim çağırışlarımıza və səylərimizə qoşularaq mümkün olan ən tez vaxtda Ukraynada atəşkəsin əldə olunmasına yardım edər. Bu, qarşıdan gələn qış üçün çox vacibdir, çünki mülki infrastruktur, xüsusən də enerji infrastrukturu bu gün də Rusiya atəşi altındadır. Amma daha geniş mənada biz beynəlxalq hüquqa hörmət edən ədalətli və davamlı sülhə nail olmaq üçün birlikdə çalışmalıyıq”, – Fransa lideri bildirib.

Rəsmi Pekinin gömrük məlumatlarına görə, Çin Fransanın yeddinci ən böyük ticarət tərəfdaşıdır və hər il təxminən 35 milyard dollarlıq mal alır. Bu məhsulların təxminən 10%-i kosmetik məhsullardır, digər əsas ixrac məhsulları arasında təyyarə hissələri və spirtli içkilər də var.