Makron üçün qorxulu ssenari | Hakimiyyətdən uzaqlaşdırılır?

Fransada “Təslim olmayan Fransa” partiyası sentyabrın 23-də Prezident Emmanuel Makronun hakimiyyətdən uzaqlaşdırılması təklifini parlamentə təqdim etmək niyyətindədir.

Bu barədə partiyanın lideri Jan-Lük Melanşon “France Inter” radiostansiyasının efirində bildirib.

“Bir il əvvəl Prezidentin istefası məsələsini qaldırmışdıq. Biz sentyabrın 23-də bu addımı yenidən atacaq və E.Makronun hakimiyyətdən uzaqlaşdırılması təklifini parlamentə təqdim edəcəyik”, – deyə o qeyd edib.

2024-cü ildə “Təslim olmayan Fransa” artıq E.Makrona qarşı impiçment prosedurunu başlatsa da, bu, uğursuz olub. Həmin vaxt Milli Assambleyanın qanunvericilik komissiyası Prezidentin hakimiyyətdən uzaqlaşdırılması haqqında qətnaməni 15 səs lehinə, 54 səs əleyhinə olmaqla rədd edib.

Xatırladaq ki, ötən aylarda “Le Figaro” qəzetinin sifarişi ilə “Odoxa-Backbone Consulting” şirkəti tərəfindən keçirilmiş ictimai rəy sorğusunun nəticələrinə görə, Fransa əhalisinin dörddəüçü Emmanuel Makronun prezident postunda son 8 illik fəaliyyətini mənfi qiymətləndirir və onun 2032-ci ildə Yelisey sarayına qayıtmasını istəmir.