Makrondan Yeni Kaledoniya ilə bağlı mühüm açıqlama

Yeni Kaledoniyada vəziyyət gərgin olaraq qalır.

Belə bir şəraitdə isə sülh yaratmaq adı altında Fransa Prezidenti Emmanuel Makron bölgəyə səfər edib.

Çıxışında isə gözlənilənlərin əksinə, “fransız polisi və jandarm qüvvələri lazım olduğu müddətə qədər Yeni Kaledoniyada qalacaq” deyib:

“Mənim və buradakı nümayəndələrimin, Fransa hökumətinin niyyəti mümkün qədər tez sülhə, əmin-amanlığa və təhlükəsizliyə nail olmaq və bu məqsədlə də əhaliyə daha da yaxın olmaqdır. Bizim əsas prioritetimiz elə budur. Ali komissar və təhlükəsizlik qüvvələrinə, o cümlədən yerli məmurlara təşəkkür edirəm.

Mən bilirəm ki, burada əksər insanlar həm sağlamlıq, həm də yemək tapmaq baxımından çox ciddi əziyyət çəkirlər. Ona görə də bu səfərdə biz iqtisadiyyatın bərpası, ümumi dəstək və potensial təhlükələrə qarşı sürətli reaksiyanın verilməsi kimi məsələləri nəzərdən keçirəcəyik. Yeni Kaledoniyanın gələcəyinin müzakirəsi də nəzərimizdədir.

İndi mən bir sıra qüvvələrin təkliflərini dinləmək üçün Ali Komissarlığın ofisinə gedəcəyəm və günün sonunda qəbul edilən qərarları ictimaiyyətə açıqlayacağam. Mən açıq şəkildə bildirmək istəyirəm. Fransa qoşunları ehtiyac olduğu müddət ərzində burada qalacaq. Hətta Olimpiya və Paralimpiya oyunları keçirilən vaxtda belə bu baş verəcək”.

“Sülh çətiri” altında adaya gələn E.Makronun açıqlaması kanakların sərt reaksiyasına səbəb olub. Onun Fransa Ordusunun burada qalmağa davam edəcəyini bildirməsi Yeni Kaledoniyadakı etirazları daha da alovlandırıb.

Yerli əhali Prezidentin gəlişini boykot edərək yolda əllərində plakatlarla etiraz ediblər.

“Budur, yanğınsöndürən hər yeri alova verəndən sonra əraziyə təşrif buyurub”, – deyə onlardan biri qeyd edib.