Makronun arvadının etdiyi hərəkət zarafatdır, yoxsa...? | Dünya mediası bu xəbərlə çalxalanır

Fransa Prezidenti Emmanuel Makron və xanımı Bricitin Vyetnama rəsmi səfəri zamanı təyyarənin qapısı açılarkən çəkilən görüntüləri hələ də müzakirə edilir.

Yelisey sarayı Bricitin ərinin üzünü itələməyini “zarafat” adlandırsa da, ekspertlər fərqli fikirdədirlər.

Fransa mətbuatı hadisəni “Şillə, yoxsa zarafat?” başlığı ilə yazıb.

“Le Parisien” kamera görüntülərinin təfərrüatlı təhlilini dərc edib və bunun gərginlik anında yaşandığına işarə edib.

Bədən dili mütəxəssisi Cudi Ceyms “Cütlüyün təyyarədən enməmişdən əvvəl ərinin üzünü itələyən Bricitin görüntüləri Emmanuel Makron üçün narahatedici görünür” kimi şərh edib.

Səfər boyu cütlüyün yan-yana yeriməsi və gülümsəyən formada görüntülənməsi diqqətlərdən qaçmayıb.

C.Ceyms cütlüyün səfərdən qol-qola ayrılmasını “aralarında problem olmadığını sübut etmək cəhdi” adlandırıb.

C.Ceyms E.Makronla həyat yoldaşı Bricitin bədən dilinin həddindən çox performans sərgilədiyini söyləyib. O qeyd edib ki, Bricit Makronun ərinin qolunu möhkəm tutması münasibətdəki rolların bölüşdürülməsi haqqında ipucu verir.

Fransa liderinin geri çəkilərkən başını çevirməsini “narahatlıq əlaməti” kimi şərh edən C.Ceyms deyib: “Partnyorun üzü ilə bu şəkildə təmas zarafat sayıla bilməz”.

E.Makronun Vyetnam Elm və Texnologiya Universitetində çıxışı zamanı da əsəbi olduğu görülüb. C.Ceymsin sözlərinə görə, çıxış zamanı uzun fasilələr və onun mikrofonla lazımsız oynaması daxili narahatlığın olduğunu göstərir.