Medvedevdən Ukraynaya kömək edənlərə mesaj | Dünya fəlakəti gələcək...

Rusiya Qərb qoşunlarının Ukraynaya göndərilməsinə cavab verəcək.

Bunu Rusiya Təhlükəsizlik Şurasının sədr müavini Dmitri Medvedev deyib.

Onun sözlərinə görə, Ukraynaya qoşun yeritmək Qərb dövlətlərinin birbaşa Rusiyaya qarşı müharibəyə başlaması kimi qəbul olunacaq və qlobal fəlakətlə nəticələnəcək:

“Qərb siyasi elitası arasında öz qoşunlarını Ukraynaya göndərməyə çağıran məsuliyyətsiz insanların səsi getdikcə artır. İndi onun tərkibinə ABŞ Konqresinin nümayəndələri, Fransa və Böyük Britaniya rəhbərliyi, Baltikyanı ölkələrdən və Polşadan olan ayrı-ayrı rəsmilər də daxildir.

Qoşunlarınızı Ukrayna ərazisinə göndərmək onların ölkələrini birbaşa müharibəyə sövq etməsi ilə nəticələnəcək və biz buna cavab verməli olacağıq. Dünya fəlakəti gələcək. Elə buna görə də aprelin 6-da Rusiya Ordusu təlimlərə, o cümlədən qeyri-strateji nüvə silahlarının hazırlanması və istifadəsinin praktiki sınaqlarına hazırlıq işlərinə başlayıb”.

Rusiya Federasiyası Təhlükəsizlik Şurasının sədr müavini sonda onu da əlavə edib ki, Moskvanın cavabından Qərb ölkələrinin liderləri nə Kapitoli təpəsinə, nə Yelisey Sarayına, nə də Dayninq küçəsi 10-a sığına biləcəklər.