Məhkəmədən Trampı özündən çıxaracaq qərar | ABŞ Prezidentinin planı baş tutmadı

ABŞ Federal Beynəlxalq Ticarət Məhkəməsi Donald Trampın prezident səlahiyyətlərindən sui-istifadə etdiyini əsas gətirərək onun idxala gömrük rüsumları tətbiq etmək qərarının icrasını ləğv edib.

Bu barədə məlumat Məhkəmənin elektron məlumat bazasında dərc olunub.

Sənəddə bildirilib ki, xitam verilmiş qərarların yenidən qüvvəyə minmə ehtimalı sıfra bərabərdir.

Məhkəmənin qərarına əsasən, D.Tramp yeni idxal tariflərini elan etməklə Beynəlxalq Fövqəladə İqtisadi Səlahiyyətlər Aktının ona verdiyi səlahiyyətləri də aşıb. Məhkəmə D.Trampın təkcə 185 ölkə və bölgədən gələn məhsullara cavab tariflərini deyil, həm də idxala tətbiq etdiyi bütün rüsumları bloklayıb.

Bu isə o deməkdir ki, qərar Çindən tədarüklərə görə 30 %, Meksika və Kanadadan bəzi malların idxalına 25 %, eləcə də 10 % universal rüsumlara təsir edəcək.

Çin Xalq Respublikasının Xarici İşlər Nazirliyinin sözçüsü Mao Ninq öz çıxışı zamanı bildirib ki, tariflər məsələsində Çin dəfələrlə öz mövqeyini açıqlayıb:

“Ticarət müharibələrində qalib yoxdur. Proteksionizmin – idxalına qadağa qoyulan məhsulların ölkədaxili inkişafına çalışmaq bütün tərəflərin maraqlarına zərər vurur. Bu, qeyri-peşəkar bir addımdır”.

Qeyd edək ki, məhkəmənin qərarı avtomobillərin və onların ehtiyat hissələrinin, polad, alüminiumun tədarükü tariflərinə şamil edilmir. Onlar “Ticarətin genişləndirilməsi qanunu”na uyğun olaraq təqdim edilib.