Məşhurlar hədəf altında | TikTok-da yaranan trend baha başa gəldi

Son günlərdə sosial şəbəkələrdə, xüsusilə də “TikTok”da “blockout2024” mövzusu kifayət qədər populyarlaşıb.

Adıçəkilən bu trendin əsas hədəfi dünyaca məşhur və kifayət qədər izləyicisi olan şəxslərdir.

Məqsəd isə həmin məşhurları Qəzzada baş verənlər qarşısında səssiz qaldıqlarını əsas gətirərək onları kütləvi şəkildə blok etməkdir. Bunun üçün istifadəçilər “X”, “TikTok” və “Instagram” da daxil olmaqla istənilən sosial media platformalarında ulduzları izləmədən çıxarırlar.

İstifadəçilər bununla da yekunlaşmayıb, internetdə bu prosesi daha da yaymaq üçün hətta sayt belə yaradıblar. Bu portalda blok edilməsi üçün nəzərdə tutulan məşhurların adının olduğu siyahı öz əksini tapıb.

Onlar arasında dünyaca məşhur Mayli Sayrus, Ariana Qrande, Demi Lovato, Selena Qomez, Biyons kimi ulduzlar da yer alıb. Bundan əlavə, Kim Kardaşyan və onun ailə üzvləri də hədəf alınan şəxslər arasındadır.

Qeyd edək ki, bu proses yalnız məşhur şəxslərə qarşı tətbiq edilmir. Hədəfdə eyni zamanda populyar marka və brendlər də var. Həmçinin ulduzların iştirakı ilə həyata keçirilən “Met Gala” kimi tədbir və görüşlər də sosial şəbəkə istifadəçilərinin nəzərindədir.

Yerli medianın yaydığı məlumata görə, “blockout2024” trendi artıq öz təsirini göstərməyə başlayıb. Belə ki, ABŞ-li müğənni Teylor Svift sosial şəbəkə hesablarında 300 minə yaxın izləyicisini itirib. Selena Qomezi 1 milyon və Billi Aylişi isə 1,1 milyon nəfər izləmədən çıxarıb.