Minlərlə insan küçələrə çıxdı | Parisdə müxalifət liderinə dəstək aksiyası keçirilir

Fransanın paytaxtı Parisdə minlərlə insan müxalifət lideri Marin Le Penə dəstək aksiyası keçirir.

İnsanlar məhkəmənin hökmü ilə dövlət orqanlarına seçilməsi qadağan olunan “Milli Birlik” Partiyasının parlament fraksiyasının lideri ilə həmrəyliklərini bildiriblər.

Mitinq iştirakçıları arasında hər yaşda olan insanlar, istər gənclər, istərsə də yaşlı fransızlar olub. Siyasətçinin özü də mitinqə gəlib. O, çıxışında məhkəmənin qərarının vətəni, xalqı, şərəfi tapdaladığını bildirib.

“Hamının bilməsini istəyirəm: təslim olmayacağam. Bizə qarşı keçirilən məhkəmə prosesinin siyasi fonunu vurğulamaqdan çəkinmirəm. Bu, məhkəmə qərarı deyil. Bu, siyasi qərardır, siyasətçilər üçün ovdur”, ‒ deyə Le Pen söyləyib.

Qeyd edək ki, Paris məhkəməsi Marin Le Pen və “Milli Birlik” Partiyasından olan bir neçə deputata Avropa Parlamentinin vəsaitlərinin mənimsənilməsi işi üzrə hökm çıxarıb. İttihama görə, Avropa Parlamenti 2004-2016-cı illər arasında Marin Le Penin partiyasından olan deputat köməkçilərinə maaş vermək üçün vəsait ayırıb, amma reallıqda köməkçilər yalnız “Milli Birlik” Partiyası üçün çalışıblar.

Marin Le Pen Avropa Parlamenti pullarının yuyulması üçün mərkəzləşdirilmiş sistem yaratmaqda təqsirkar bilinib. Ona 2 ili şərti olmaqla, 4 il həbs cəzası verilib və 5 il müddətinə dövlət vəzifələrinə seçilməsi qadağan olunub.