Miqrant problemi ABŞ-nin başına bəla oldu | Los-Ancelesi iğtişaşlar bürüdü

ABŞ-nin Los-Anceles şəhərində qeyri-qanuni miqrantların kütləvi saxlanmasına qarşı etirazlar başlayıb.

Xarici medianın məlumatına görə, iyunun 6-da şəhərdə hüquq-mühafizə orqanları qanunsuz miqrantların saxlanması əməliyyatına başlayıb.

Bir sutka ərzindı azı 44 nəfər immiqrasiya qanunlarını pozmaqda ittiham olunaraq həbs edilib. Hüquq-mühafizə orqanlarının hərəkətlərinə cavab olaraq şəhərdə nümayişlər başlayıb. CBS telekanalının məlumatına görə, etirazçılar yolu bağlayıb, avtomobilləri yandırıb, hüquq-mühafizə orqanları əməkdaşlarına daş və fişənglər atıblar.

ABŞ-nin müdafiə naziri Pit Heqset etirazları yatırmaq üçün Los-Ancelesə Dəniz Piyadaları Korpusu qoşunlarının göndərilməsinə qərar verib. O, bu barədə məlumatı “X” hesabında açıqlayıb.

Pentaqon rəhbərinin sözlərinə görə, Los-Ancelesdə etirazçılarla ABŞ İmmiqrasiya və Gömrük Mühafizəsi əməkdaşları arasında qeyri-qanuni miqrantlara görə toqquşmalar ölkənin milli təhlükəsizliyinə ciddi təhlükə yaradır.