Moldova da müharibəyə qoşulur?

Bir ildən çoxdur Rusiyanın Ukraynada apardığı müharibə artıq qonşu Moldovaya da sirayət etməyə başlayıb. Xüsusilə bu ilin əvvəlindən Rusiyanın raket zərbələri nəticəsində Moldova ilə sərhəddə enerji infrastrukturunu zədələməsi bu ölkə üçün təhlükə riskini artırıb.

Moldova Parlamentinin deputatı Vitali Jakot son durumu Baku TV-nin Şərqi Avropa bürosuna açıqlayıb.

O qeyd edib ki, Rusiya Moldovanı silahlı münaqişəyə cəlb etməyə və onun ərazisindən Ukraynaya qarşı hərbi əməliyyatlar meydanı kimi istifadə etməyə çalışır: “Buraya həm turist adı altında silahlı münaqişədə iştirak edə biləcək bir qrup insanın cəlb olunması, həm də müxtəlif dövlət müəssisələrinə partlayıcı maddələrin yerləşdirilməsi ilə bağlı xəbərlərin yayılması və Rusiyayönümlü qüvvələrin etiraz aksiyaları keçirməsi daxildir. Bu etiraz aksiyalarında iştirak edən insanlara maliyyə vəsaiti verilir. Moskva adıçəkilən addımlarla əsasən Dnestryanıda sabitliyin pozulmasına çalışır. Bu bölgədə Rusiya qoşunları, yəni “sülhməramlı kontingent” yerləşdirilib. Üstəlik, burada Avropanın ən böyük döyüş sursatı olan anbar var. Odur ki, Moskva bu imkanlardan Ukraynaya qarşı istifadə etmək istərdi. Buraya ilk növbədə Rusiyanın Ukraynanın Odessa, Nikoloyev şəhərləri istiqamətində hərbi əməliyyatlar keçirmək istəyi daxildir. Amma Moldova hakimiyyəti vəziyyətə nəzarət edə bilir”.

Qeyd edək ki, Rusiya son günlər Ukraynanın bütün bölgələrinə havadan hücumları artırıb.