Moldovada gərginlik artdı: ölkə silahlanır

Rusiyanın Ukraynada bir ildən çoxdur apardığı müharibənin əsas təhdid təşkil edən hədəflərindən biri də qonşu Moldovadır.

Ölkənin parlament sədri İqor Qrosu Baku TV-nin Şərqi Avropa bürosuna bildirib ki, bu il parlament son 30 ildə ilk dəfə olaraq hərbi büdcəni 2 dəfə artırıb.

“Hazırda hərbi büdcəmiz 1.7 milyard ley təşkil edir. Bu vəsait müdafiə qabiliyyətimizin gücləndirilməsinə, hərbçilərin həyatlarının yaxşılaşdırılmasına xərclənəcək. Hazırda arsenalımızda olan köhnəlmiş sovet texnikasını yenisi ilə əvəz edirik. Zənnimcə, bu, düzgün qərardır, gələcəkdə də belə addımları dəstəkləyəcəyəm”, – deyə İqor Qrosu qeyd edib.

Moldavanın müdafiə naziri Anatoli Nosatıy isə bildirib ki, ölkəsi istənilən vəziyyətə hazırdır.

“Rusiya Moldovada sabitliyi pozmaq üçün hibrid müharibənin bütün elementlərindən istifadə edir. Rəsmi Moskva ölkəmizin daxili işinə qarışaraq Moldovada gərginlik yaratmağa çalışır. Moldova Müdafiə Nazirliyi isə bunun qarşısını almaq üçün lazımi tədbirləri görür. Biz Silahlı Qüvvələrin, ehtiyat birliklərin müntəzəm məşqlərini keçirərək ordumuzun modernizasiya və transformasiyası prosesini həyata keçiririk”, – deyə Anatoli Nosatıy vurğulayıb.

Qeyd edək ki, son vaxtlar Rusiya Ukraynanın Moldova ilə təmas xəttində hərbi fəallığı artırıb.