Moskvadakı partlayışın pərdəarxası | Sarkisyanın ölümü barədə sensasiya yaradan məlumat

Naməlum şəxs Moskvada “Alıye parusa” yaşayış kompleksinin foyesində quraşdırılan partlayıcı qurğunu Armen Sarkisyanın meydana çıxmasını gözləyib, uzaqdan işə salıb.

Bu barədə TASS hüquq-mühafizə orqanlarına istinadla məlumat yayıb.

“Dəhlizdəki divanda əvvəlcədən yerləşdirilən partlayıcı qurğu uzaqdan işə salınıb. Çox güman ki, A.Sarkisyanı kənardan izləyiblər. O, dəhlizə çıxanda bomba işə düşüb”, – agentliyin mənbəsi bildirib.

TASS-ın məlumatına görə, hazırda təhlükəsizlik qüvvələri yaşayış kompleksində və onun ətrafında kimin olduğunu müəyyən etmək üçün videokamera qeydlərini öyrənirlər.

Qeyd edək ki, Moskvanın şimal-qərbindəki 29 mərtəbəli yaşayış kompleksində baş verən partlayışda Armen Sarkisyan və mühafizəçisi ölüb. A.Sarkisyan Ukraynada döyüşən “Arbat” batalyonunun yaradıcısı, “Donbas Xalq Respublikası”nın “boks federasiyası”nın “prezidenti”dir. O, Ukraynaya qarşı savaş üçün Donetsk, Luqansk, Zaporojye və Xerson vilayətlərinin müvəqqəti işğal olunmuş ərazilərində məhbuslar arasından qanunsuz silahlı birləşmələr yaratmağa kömək edib. Onu Ukrayna kəşfiyyatının məhv etdiyi ehtimal edilir.