Moskvadakı terrorda ölənlərin sayı artdı | Yaralıların son vəziyyəti
“Crocus City Hall”da baş verən terror hadisəsində ölənlərin sayı artıb.
Bu barədə Rusiyanın səhiyyə naziri Mixail Muraşko məlumat verib.
Bildirib ki, teraktda yaralanan bir nəfər xəstəxanada dünyasını dəyişib. Bununla da adıçəkilən ticarət mərkəzində baş verən terror hadisəsində ölənlərin sayı 140-a çatıb.
Nazirin sözlərinə görə, 6-sı uşaq olmaqla xəsarət alan 86 nəfərin isə müalicəsi davam etdirilir. Bundan başqa, 95 nəfərin taleyi barəsində hələ də heç bir məlumat yoxdur.
"BAZA" “Telegram” kanalının yaydığı məlumata görə, siyahılar yaxınlarının müraciəti əsasında əməliyyat xidmətlərinin əməkdaşları tərəfindən tərtib edilib. Bu siyahılara qohumları terror aktından sonra əlaqə saxlaya bilməyən, lakin qurbanlar və ölənlər siyahısında olmayan şəxslər daxildir.
"Bəlkə də, bu insanların bəziləri ölüb, lakin hələlik şəxsiyyətləri müəyyən edilməyib", – deyə kanal yazıb.
Məlumat üçün bildirək ki, Moskvada yerləşən "Crocus City Hall" konsert zalında terror aktı martın 22-də baş verib.