"Mübahisələrin sülh yolu ilə həllindən başqa alternativi yoxdur" | Stefan Düjarrik

"Baş katib beynəlxalq hüquqla bağlı məsələlərdə çox aydın mövqe tutub və bir daha bütün tərəfləri bu hərbi əməliyyatların aparılması ilə bağlı öhdəliklərinə əməl etməyə çağırır. O xatırladır ki, enerji infrastrukturu da daxil olmaqla, mülki infrastrukturlara hücum edilə bilməz, hətta konkret mülki infrastruktur hərbi məqsəd kimi qiymətləndirilsə belə, beynəlxalq humanitar hüquq onlara qarşı hücumları qadağan edir".

Bu sözləri BMT Baş katibinin sözçüsü Stefan Düjarrik söyləyib.

O bildirib ki, beynəlxalq mübahisələrin sülh yolu ilə həllindən başqa alternativi olmadığı üçün tərəflərin bu münaqişəni dayandırmasının vaxtı çatıb.

Qeyd edək ki, Hörmüz boğazının açılması üçün güc tətbiqi ilə bağlı qətnamə layihəsi BMT Təhlükəsizlik Şurasının iclasında rədd edilib. Bəhreynin təklif etdiyi sənəddə beynəlxalq qüvvələrin boğazda naviqasiyanı təmin etmək üçün bütün zəruri tədbirlərdən istifadə etməsi ehtimalı nəzərdə tutulurdu.

Bu qətnamənin qəbulu faktiki olaraq İrana qarşı hərbi variantı təsdiqləməli idi. Amma səsvermədə Rusiyanın bitərəf qalması gözlənilsə də, əleyhinə səs verib. Fransa və Çin də qətnaməyə qarşı çıxıblar, bu da layihənin lazımi dəstəyi ala bilməməsi deməkdir.

Müşahidəçilər qeyd edirlər ki, Moskva və Parisin səsvermə ilə bağlı mövqelərinin uyğunlaşması nadir haldır, çünki ölkələr adətən beynəlxalq təhlükəsizlik məsələlərində fərqli mövqelər tuturlar.