Müəmmalı taleyi olan koloniya | Bu əhalinin başına nələr gəlib?

Şimali Amerikada 435 il əvvəl izsiz yoxa çıxmış ingilis Rounok koloniyası, əslində, yerli hindu tayfası tərəfindən assimilyasiya edilib.

Britaniyalı arxeoloqların hazırladığı hesabatda belə deyilir.

Tarixi mənbələrə görə, Rounok koloniyası ilə bağlı yazılı məlumatlar 1587-ci ildən sonra qeydə alınmayıb. Baş verən ingilis-ispan müharibəsi səbəbi ilə kolonistlər çətinlik halında materikin içinə doğru köç etməli və getdikləri istiqaməti ağac üzərində qeyd etməli idilər. O zaman yalnız bir yazı tapılmışdı ‒ Kroatoan. Lakin orada kolonistlərdən heç bir iz tapılmamışdı.

Britaniyalı arxeoloqların son araşdırmaları isə təsdiqləyir ki, kolonistlər Kroatoan tayfasının yaşadığı digər adaya ‒ Xatterasa köç ediblər.

Bu iddia XVIII əsrdən bəri elmi müzakirələrdə yer alsa da, indi onu sübut edən arxeoloji dəlillər də üzə çıxıb.

Belə ki, həmin ərazidə tapılan və yüksək texnoloji səviyyədə olan dəmirçilik izləri həmin dövrdə yalnız ingilis ustalara məxsus ola bilərdi.

Arxeoloq Mark Houton qeyd edir ki, bu sənətkarlıq nümunələri Şimali Amerikanın yerli hindu tayfalarına xas deyil və bu, kolonistlərin yerli əhali ilə birlikdə yaşayıb onların bir hissəsinə çevrildiyini sübut edir.