Müharibə hansı halda genişlənə bilər? | Regionda təhlükə siqnalı - Baku TV

“İranın hücum etdiyi ölkələr əks-hücum hüquqlarından istifadə etsə, müharibənin cəbhəsi ikitərəfli genişlənəcək”.

Bunu Türkiyənin xarici işlər naziri Hakan Fidan canlı yayımda deyib.

O bildirib ki, İranın hücumuna məruz qalan ölkələrdə hədəf yalnız ABŞ-nin bazaları deyil, enerji obyektləri də atəşə tutulur, savaşın daha geniş coğrafiyaya yayılma ehtimalı Türkiyəni də narahat edir.

Hakan Fidan həmçinin ABŞ ilə İsrailin İrana hücumlarının nə qədər davam edəcəyinin hələlik məlum olmadığını bildirib və əlavə edib ki, hücum edən tərəflərin məqsədi İranın sahib olduğu hərbi gücü aradan qaldırmaq, eyni zamanda İranda idarəçilik sistemini dəyişməkdir.

Türkiyənin xarici işlər naziri hücuma məruz qalan İranın strategiyasından da danışıb. Onun sözlərinə görə, İranın hücum etdiyi enerji ölkələri dünya iqtisadiyyatı üçün önəmlidir, İran da bunu bilir, enerji təhlükəsizliyinə təhdid yaratmaq təzyiq metodur.